Home » ठळक बातम्या, राजकीय, राष्ट्रीय » कॉंग्रेस, डाव्यांच्या आक्रोशास अल्प प्रतिसाद

कॉंग्रेस, डाव्यांच्या आक्रोशास अल्प प्रतिसाद

वृत्तसंस्था
नवी दिल्ली, २८ नोव्हेंबर –
bharat-band-against-demonetization-failed५०० आणि एक हजार रुपयांच्या नोटा चलनातून हद्दपार करण्याच्या पंतप्रधान नरेंद्र मोदी यांच्या निर्णयाविरोधात कॉंग्रेस आणि डाव्यांसह अन्य पक्षांनी आज सोमवारी देशव्यापी जनआक्रोश केला. कॉंग्रेस, डावे आणि अन्य राजकीय पक्षांच्या या जनआक्रोशमध्ये त्यांच्याच कार्यकर्त्यांची उपस्थिती अल्प राहिल्याने आंदोलनाचा पुरता फज्जा उडाला.
नोटबंदीच्या निर्णयामुळे देशात अभूतपूर्व आर्थिक गोंधळ निर्माण झाला, असा आरोप डाव्यांनी केला, तर पंतप्रधानांनी आपल्या मन की बात कार्यक्रमातून कॅशलेस सोसायटी निर्माण करण्याचा संदेश देऊन आपली असंवेदनशीलता प्रकट केली, असा आरोप कॉंग्रेसने केला.
नोटबंदीचा निर्णय गरीबविरोधी आणि श्रीमंतांना अनुकूल असून, नव्या नोटा मुबलक प्रमाणात उपलब्ध होईपर्यंत सरकारने लोकांना जुन्या नोटा वापरण्याची परवानगी द्यावी, अशी मागणी माकपचे सरचिटणीस सीताराम येचुरी यांनी केली. माकप आणि भाकपसह सर्वच डावे पक्ष जनआक्रोशमध्ये सहभागी झाले होते. नोटबंदीच्या माध्यमातून पंतप्रधानांनी देशबंदी केली आहे, असा आरोपही त्यांनी केला.
देशातील सुमारे ९० टक्के लोक दररोज रोखीने व्यवहार करीत असतात. पण, नोटबंदीमुळे त्यांना दैनंदिन जीवनात त्रास सहन करावा लागत आहे. यासाठी आम्ही सरकारचा निषेध करतो. एक हजार रुपयाची नोट बंद करून दोन हजाराची नोट चलनात आणल्यामुळे भ्रष्टाचार आणखी वाढेल, अशी भीतीही त्यांनी व्यक्त केली.
पंतप्रधानांनी देशाची माफी मागावी, अशी मागणी कॉंग्रेसने केली आहे. देशातील फारच कमी लोक डेबिट आणि क्रेडिट कार्डचा वापर करीत असताना, कॅशलेस सोसायटी निर्माण करण्याचा विचार गरिबांचा अपमान करणारा आहे, असा आरोप पक्षाचे नेते आनंद शर्मा यांनी केला. जवळ पैसा नसल्याने लोक बँकांसमोरील लांबच लांब रांगांमध्ये उभे आहेत. यात अनेकांचा मृत्यू झाला. पण, मोदींना याविषयी काहीच वाटत नाही, ते असंवेदनशील झाले आहेत. मोदी यांना ज्यातून समाधान मिळते, तेच करीत आहेत. मोदी यांनी मन की बात करण्याऐवजी लोकांचा आक्रोश ऐकावा, असेही ते म्हणाले. सपा, बसपा आणि तृणमूल कॉंग्रेससह काही राजकीय पक्ष या जनआक्रोशात सहभागी झाले होते.
महाराष्ट्रात फज्जा
महाराष्ट्रात कॉंग्रेस आणि अन्य विरोधी पक्षांच्या जनआक्रोशचा पार फज्जा उडाला. आता आम्ही संसदेत हा मुद्दा उपस्थित करीत आहोत. ५ डिसेंबरपासून राज्य विधिमंडळाचे हिवाळी अधिवेशन नागपुरात सुरू होत असून, तिथेही आम्ही या मुद्यावर आवाज उठविणार आहोत, असे प्रदेश कॉंग्रेसचे अध्यक्ष अशोक चव्हाण यांनी सांगितले.
सरकारने विजय मल्ल्यांचे कर्ज माफ केले, पण सामान्य व गरीब शेतकर्‍यांना कर्जमाफी दिली नाही. केंद्रातील भाजपा सरकार गरीबविरोधी आहे. नोटबंदीनंतरच्या काळात राज्यात नऊ शेतकर्‍यांनी आत्महत्या केली. पण, सरकारला त्याविषयी काहीच वाटत नाही, अशी टीकाही त्यांनी केली.
केरळात जनजीवन ठप्प
डाव्यांची सत्ता असलेल्या केरळात मात्र जनआक्रोशला जोरदार प्रतिसाद मिळाला. डाव्यांनी राज्यात १२ तासांचा हरताळही पुकारला होता. या काळात जनजीवन पूर्णपणे ठप्प झाले होते. बाजारपेठा, व्यापारी प्रतिष्ठाने, शाळा आणि महाविद्यालयांसोबतच रस्त्यांवरील वाहतूकही ठप्प होती.

शेअर करा

Posted by on Nov 28 2016. Filed under ठळक बातम्या, राजकीय, राष्ट्रीय. You can follow any responses to this entry through the RSS 2.0. You can leave a response or trackback to this entry

प्रतिक्रिया नोंदवा

Enable Google Transliteration.(To type in English, press Ctrl+g)

हवामान

  • दृष्टीक्षेपात

      व्हिडीओ संग्रह

      मागील बातम्या, लेख शोध

      Search by Date
      Search by Category
      Search with Google