Home » अमेरिका, आंतरराष्ट्रीय, ठळक बातम्या » क्युबाचे स्वतंत्र अस्तित्व कायम ठेवणारे कॅस्ट्रो!

क्युबाचे स्वतंत्र अस्तित्व कायम ठेवणारे कॅस्ट्रो!

वृत्तसंस्था
क्युबा, २६ नोव्हेंबर –

FILE - In this July 11, 2014 file photo, Cuba's Fidel Castro speaks during a meeting with Russia's President Vladimir Putin, in Havana, Cuba. Social media around the world have been flooded with rumors of Castro's death, but there was no sign Friday, Jan. 9, 2015, that the reports were true, even if the 88-year-old former Cuban leader has not been seen in public for months. (AP Photo/Alex Castro, File)

महासत्ता अमेरिकेचा विचार केल्यास या देशापासून जवळच असलेला क्युबा हा देश अमेरिकेच्या तुलनेत मुंगीएवढाच आहे. वेगवेगळ्या मुद्यांवर अमेरिकेने क्युबाचा नेहमीच विरोध केला. पण, त्या विरोधला न जुमानता क्युबाने आपले स्वतंत्र अस्तित्व कायम ठेवले आणि अमेरिकेपुढे सातत्याने आपले आव्हान कायम ठेवले. क्युबाला ही ताकद केवळ फिडेल कॅस्ट्रो यांच्यामुळेच लाभली होती.
फिडेल कॅस्ट्रो यांचा जन्म क्युबातील एका समृद्ध कुटुंबात झाला. घरात जन्मजात श्रीमंती असल्याने त्यांना काहीच कमी नव्हती. मात्र, वाढत्या वयानुसार फिडेल यांना जगाची समज येत गेली आणि आजूबाजूची स्थिती कळू लागली. आपण राहतो ते जग आणि दीनदुबळ्यांचे जग यातील तफावत त्यांच्या काळजाचा ठाव घेऊ लागली. यातूनच पुढे ते मार्क्सवादी-लेनिनवादी बनले.
रोमन कॅथलिक स्कूलमधून प्राथमिक शिक्षण घेतल्यानंतर त्यांनी हवाना विद्यापीठातून वकिली केली. तिथेच समाजशास्त्रात पदवी मिळवली. शिक्षणात अतिशय हुशार असणारे फिडेल कॅस्ट्रो यांनी क्युबातील तत्कालिन राजवटीविरोधात बंड पुकारले. क्युबात त्यावेळी बॅतिस्ता यांची राजवट होती. बॅतिस्ता यांची सत्ता अमेरिकेच्या जवळ जाणारी मानली जायची. किंबहुना, अमेरिकेनेही वेळोवेळी फिडेलविरोधात कधी प्रत्यक्ष, तर कधी अप्रत्यक्ष भूमिका घेत बॅतिस्ताला पाठिंबा असल्याचे दाखवून दिले होते. याविरोधात फिडेल धाडसाने उभे राहिले.
१९५३ मध्ये प्रथमच बॅतिस्ता यांच्या सत्तेविरोधात फिडेल यांनी सशस्त्र बंड पुकारले. लोकांमधून उठाव केला. १०० साथीदारांसोबत फिडेल यांनी राजवटीविरोधात हल्ला चढवला. मात्र, त्यांचा उठाव अयशस्वी ठरला. या हल्ल्यानंतर फिडेल आणि त्यांचा भाऊ रौल यांना तुरुंगात डांबण्यात आले. दोन वर्षांनंतर सुटका झाली. मात्र फिडेल शांत बसले नाही. त्यांनी पुन्हा जुलमी राजवटीविरोधात आवाज बुलंद केला. यावेळी अर्जेंटिनाचा तरुण क्रांतिकारी नेता चे गव्हेरा त्यांच्या खांद्याला खांदा लावून लढला. अखेर १९५९ मध्ये भ्रष्टाचार, असमानता आणि जुलमी राजवटीचे प्रतीक ठरलेल्या बॅतिस्ता सत्तेचा पाडाव करून फिडेल सत्तेवर आले. फिडेल यांना क्युबावासीयांचे भक्कम समर्थन मिळाले.
१९५९ मध्ये क्युबात क्रांती झाली. क्युबाने साम्यवादी विचारसरणी स्वीकारली. ही क्रांती दडपण्यासाठी अमेरिकेने अनेक प्रयत्न केले. मात्र, रौल कॅस्ट्रो आणि क्रांतिकारी नेता गव्हेरा यांच्या मदतीने फिडेल यांनी अमेरिकेला नमते घेण्यास भाग पाडले.
फिडेल कॅस्ट्रो हे क्युबामधील कम्युनिस्ट पार्टीचे पहिले सचिव होते. फेब्रुवारी १९५९ ते डिसेंबर १९७६ इतका दीर्घकाळ त्यांनी क्युबाचे पंतप्रधान म्हणून जबाबदारी सांभाळली. त्यानंतर राष्ट्राध्यक्षपदी विराजमान झाले. क्रांती यशस्वी झाल्यानंतरही अमेरिकेने त्यांना त्रास देणे सुरूच ठेवले. त्यांच्यावर अनेकदा प्राणघातक हल्लेही झाले. संशयाची सुई अमेरिकेकडेच वळत होती. सीआयएने फिडेल यांच्या हत्येचा कट रचल्याच्या अनेक कथा गोपनीय दस्तावेजातून उघड झाल्या. मात्र, फिडेल कधीही डगमगले नाही. डझनभर अमेरिकन अध्यक्ष आणि बलाढ्य सीआयएला त्यांनी एकहाती नमवले.

शेअर करा

Posted by on Nov 26 2016. Filed under अमेरिका, आंतरराष्ट्रीय, ठळक बातम्या. You can follow any responses to this entry through the RSS 2.0. You can leave a response or trackback to this entry

प्रतिक्रिया नोंदवा

Enable Google Transliteration.(To type in English, press Ctrl+g)

हवामान

  • दृष्टीक्षेपात

      व्हिडीओ संग्रह

      मागील बातम्या, लेख शोध

      Search by Date
      Search by Category
      Search with Google