Home » ठळक बातम्या, राष्ट्रीय, संसद » नोटबंदीने सातव्या दिवशीही संसदेची कोंडी

नोटबंदीने सातव्या दिवशीही संसदेची कोंडी

=पंतप्रधानांकडून माफीची विरोधकांची मागणी=
वृत्तसंस्था
नवी दिल्ली, २५ नोव्हेंबर –
sansad1नोटबंदीच्या मुद्यावरून विरोधकांच्या अभूतपूर्व गोंधळामुळे संसदेच्या दोन्ही सभागृहांमध्ये आज सलग सातव्या दिवशीही कामकाज होऊ शकले नाही. नोटबंदीला विरोध करणार्‍यांना पंतप्रधान नरेंद्र मोदी यांनी धारेवर धरल्यानंतर विरोधक अधिकच संतप्त झाले असून, पंतप्रधानांनी विरोधकांची माफी मागावी, अशी मागणी केली आहे. सरकारने मात्र त्यांची ही मागणी फेटाळून लावली. शनिवार आणि रविवार असे दान दिवस सुटी आली असल्याने संसदेचे कामकाज आता सोमवारीच सुरू होणार आहे.
कॉंगे्रस, तृणमूल कॉंगे्रस. समाजवादी पार्टी, बसपा आणि डाव्या पक्षांच्या सदस्यांनी लोकसभा आणि राज्यसभेत जोरदार गोंधळ घातला.
आज सकाळी एका कार्यक्रमात बोलताना मोदी यांनी विरोधकांवर जोरदार हल्ला चढवताना, सर्वसामान्यांच्या अडचणींमुळे नव्हे, तर सरकारने विरोधकांना त्यांचा काळा पैसा पांढरा करण्यासाठी कुठलाही वेळ न देता नोटबंदीचा निर्णय जाहीर केल्याने ते या निर्णयाला विरोध करीत आहेत, असा चिमटा काढला होता. पंतप्रधानांचे हे वक्तव्य विरोधकांच्या जिव्हारी लागले असल्याचेच दिसून येत आहे.
राज्यसभेचे कामकाज आज सकाळी सुरू झाल्यानंतर दिवंगत सदस्य दीपेन घोष यांना श्रद्धांजली वाहण्यात आली. त्यानंतर बसपा नेत्या मायावती यांनी पंतप्रधानांवर हल्लाबोल केला. विरोधकांजवळ काळा पैसा आहे, हा पंतप्रधानांचा आरोप खोटा असून, यासाठी त्यांनी आमची माफी मागावी, अशी मागणी मायावती यांनी केली.
विरोधी पक्षनेते गुलाम नबी आझाद यांनीही आपला संताप व्यक्त केला. सर्व विरोधक काळ्या पैशाच्या विरोधात आहेत, हे माजी पंतप्रधान डॉ. मनमोहनसिंग यांनी गुरुवारी सभागृहातील चर्चेत स्पष्ट केले असताना पंतप्रधान मोदी अशा प्रकारचा आरोप कसा करू शकतात, असा सवाल आझाद यांनी केला. आमचा आधीपासूनच काळ्या पैशाला विरोध असल्याने पंतप्रधानांच्या वक्तव्यामुळे आम्ही व्यथित झालो आहोत. त्यांनी आमची मागायलाच हवी, असे आझाद म्हणाले. यावेळी विरोधी सदस्यांनी अध्यक्षांच्या आसनापुढील मोकळ्या जागेत धाव घेतली आणि ‘प्रधानमंत्री माफी मांगो’ अशा जोरदार घोषणा दिल्या. भाजपा सदस्यांनीही विरोधकांवर प्रतिहल्ला चढवला आणि पंतप्रधान माफी मागणार नाही, अशी भूमिका घेतली. या गोंधळात सुरुवातीच्या दोन तहकुबीनंतर उपाध्यक्ष पी. जे. कुरियन यांनी सभागृहाचे कामकाज दिवसभरासाठी तहकूब केले.
लोकसभेतील गोंधळाचे चित्रही यापेक्षा वेगळे नव्हते. नोटबंदीच्या निर्णयाला विरोध कायम ठेवताना कॉंगे्रससह सर्व विरोधकांनी सभागृहात प्रचंड गोंधळ घातला. या सभागृहातही पंतप्रधानांच्या काळ्या पैशावरील वक्तव्याचा जोरदार निषेध करण्यात आला. सतत दोनवेळा कामकाज तहकूब करण्यात आले. पण, त्यानंतरही गोंधळ कायम राहिल्याने सभापती सुमित्रा महाजन यांनी अखेर दिवसभरासाठीच कामकाज तहकूब केले.

प्रेक्षक गॅलरीतून उडी मारण्याचा प्रयत्न
लोकसभेतील प्रेक्षक गॅलरीतील एका व्यक्तीने आज शुक्रवारी सभागृहाच्या चेम्बरमध्ये उडी मारण्याचा प्रयत्न केला. तथापि, तिथे साध्या गणवेशात असलेल्या पोलिसांनी तो हाणून पाडला.
राकेशसिंह बघेल असे या युवकाचे नाव असून, तो उत्तर प्रदेशचा राहणारा आहे. नोटबंदीच्या मुद्यावरून विरोधकांनी गोंधळ घातल्यानंतर सभापती सुमित्रा महाजन यांनी सभागृहाचे कामकाज ४० मिनिटांसाठी तहकूब केले. यानंतर सदस्य सभागृहाबाहेर जात असताना, काही सदस्यांचे लक्ष प्रेक्षक गॅलरीतून उडी मारण्याच्या तयारीत असलेल्या युवकाकडे गेले. त्यांनी लगेच पोलिसांना माहिती दिली आणि पोलिसांनी त्याला पकडून बाहेर काढले.

शेअर करा

Posted by on Nov 25 2016. Filed under ठळक बातम्या, राष्ट्रीय, संसद. You can follow any responses to this entry through the RSS 2.0. You can leave a response or trackback to this entry

प्रतिक्रिया नोंदवा

Enable Google Transliteration.(To type in English, press Ctrl+g)

हवामान

  • दृष्टीक्षेपात

      व्हिडीओ संग्रह

      मागील बातम्या, लेख शोध

      Search by Date
      Search by Category
      Search with Google