Home » ठळक बातम्या, राष्ट्रीय, संरक्षण » पाकिस्तानी दूतावासातील हेरगिरीचे रॅकेट उघड

पाकिस्तानी दूतावासातील हेरगिरीचे रॅकेट उघड

♦दोघांना अटक, अधिकार्‍याला देश सोडून जाण्याचे निर्देश
♦भारताने उच्चायुक्ताला बोलावून व्यक्त केली नाराजी,
Maulana Ramzan (L) and Jangir in police custudyतभा वृत्तसेवा
नवी दिल्ली, [२७ ऑक्टोबर] – लष्कर आणि देशातील अन्य सुरक्षा यंत्रणांची हेरगिरी करणार्‍या पाकिस्तानी दूतावासातील एका रॅकेटचा दिल्ली पोलिसांच्या गुन्हे शाखेने पर्दाफाश केल्यामुळे राजधानीत खळबळ उडाली आहे. याप्रकरणी पाकिस्तानी दूतावासातील एका अधिकार्‍याला ताब्यात घेऊन त्याची चौकशी करण्यात आली. दोन भारतीय नागरिकांनाही याप्रकरणी अटक करण्यात आली आहे. हेरगिरीच्या या प्रकरणाची परराष्ट्र मंत्रालयाने गंभीर दखल घेतली असून पाकिस्तानचे भारतातील उच्चायुक्त अब्दुल बासित यांना बोलावून समज देण्यात आली आहे.
या हेरगिरी प्रकरणी गुन्हे शाखेने महमूद अख्तर नावाच्या अधिकार्‍याला ताब्यात घेऊन त्याची चौकशी केली. त्याच्या जवळून भारतीय लष्कराशी संबंधित अति गोपनीय माहितीचे दस्तावेजही ताब्यात घेण्यात आले आहे. दूतावासातील अधिकारी असल्यामुळे महमूद अख्तरला अटक करता आली नाही, त्यामुळे त्याला तातडीने देश सोडून जाण्याचे आदेश देण्यात आले आहेत. या हेरगिरी प्रकरणाचे धागदोरे पाकिस्तानी लष्कर आणि पाकिस्तानी गुप्तचर यंत्रणा आयएसआयपर्यत पोहोचले आहेत.
या हेरगिरी प्रकरणाची माहिती पोलिस उपायुक्त (गुन्हे शाखा) रवींद्र यादव यांनी आज एक पत्रपरिषद घेऊन जाहीर केली. महमूद अख्तर पाकिस्तानी लष्कराच्या बलुच रेजिमेंटमध्ये होता. तीन वर्षापूर्वी त्याला आयएसआयने आपल्या सेवेत घेत भारतातील पाकिस्तानी दुतावासात तैनात करण्यात आले. याठिकाणी त्याची नियुक्ती व्हिसा विभागात करण्यात आली, जेणेकरून त्याला हेरगिरीच्या दृष्टीने माणसं हेरता येतील.
भारतीय लोकांकडून लष्कर तसेच देशातील अन्य सुरक्षा यंत्रणांबाबतची अतिगोपनीय माहिती गोळा करण्याचे काम महमूद अख्तर करायचा. यासाठी या लोकांना माहितीच्या महत्त्वाप्रमाणे दोन हजारापासून दोन लाख रुपयापर्यंतची रक्कम देण्यात येत होती. नंतर पाकिस्तानी दूतावासामार्फत ही माहिती पाकिस्तानला पाठवली जायची. महमूद अख्तरला ताब्यात घेतल्यानंतर त्याने प्रारंभी आपण भारतीय असल्याचा दावा केला. यासाठी एक बनावट आधारकार्डही त्याने दाखवले. मात्र नंतर तो फुटला.
हेरगिरी प्रकरणाबाबत गुप्तचर खात्याने पोलिसांनी माहिती दिली होती. त्यामुळे सहा महिन्यांपासून या दोघांवर पोलिस पाळत ठेवून होते. या प्रकरणात आणखी काही लोकांचा सहभाग असल्याची पोलिसांची माहिती आहे. पोलिस या लोकांच्याही शोधात आहे. हेरगिरीच्या या प्रकरणात लष्कर आणि सीमा सुरक्षा दलातील कोणी सामील असावे आणि त्यांच्याकडूनच या दोघांना माहिती मिळत असावी, असा पोलिसांचा संशय आहे. पोलिसांनी याची माहिती केंद्रीय गृहमंत्री राजनाथसिंह आणि दिल्लीचे नायब राज्यपाल नजीब जंग यांनाही दिली.
पोलिसांनी या हेरगिरी रॅकेटची कुणकुण लागली होती. त्यामुळे पोलिसांनी दिल्ली प्राणीसंग्रहालयाजवळ एका भारतीयाकडून संवेदनशील माहिती घेताना महमूद अख्तरला गुरुवारी रंगेहात पकडले. पोलिसांनी याप्रकरणी राजस्थानच्या नागौरचे रहिवासी असलेल्या मौलाना रमजान आणि सुभाष जांगिड यांना अटक केली. हे दोघेही आयएसआयसाठी काम करत होते. भारतीय लष्कराच्या तैनातीबाबतची तसेच सीमा सुरक्षा दलाबाबतची अति गोपनीय माहिती, आणि नकाशे या दोघांकडून जप्त करण्यात आले. विशेष म्हणजे हे दोघे नागपूरवरुन दिल्लीवरुन आले होते.
बासित यांचा उलट कांगावा
हेरगिरी प्रकरणी पाकिस्तानी दूतावासातील एका अधिकार्‍याला ताब्यात घेतल्याची माहिती दिल्ली पोलिसांच्या गुन्हे शाखेने परराष्ट्र मंत्रालयाला दिली. परराष्ट्र मंत्रालयाने याची गंभीर दखल घेत पाकिस्तानचे भारतातील उच्चायुक्त अब्दुल बासित यांच्यावर समन्स बजावला. परराष्ट्र सचिव एस. जयशंकर यांनी बासित यांनी या हेरगिरी प्रकरणाची माहिती देत आपली तीव्र नाराजी व्यक्त केली. महमूद अख्तरला ‘पर्सोना नॉन ग्राटा’ घोषित करून त्याने तातडीने देश सोडून जावे, असे निर्देश जयशंकर यांनी दिले.
हेरगिरी प्रकरणात पाकिस्तानी दूतावासातील अधिकार्‍याच्या सहभागाचा आरोप अब्दुल बासित यांनी फेटाळून लावला. पाकिस्तानचा अशा कोणताही प्रकरणात सहभाग नसतो, ज्यामुळे राजनैतिक शिष्टाचाराचे उल्लंघन होईल, असे बासित यांनी स्पष्ट केले. दूतावासातील अधिकार्‍याला देश सोडून जाण्याचे आदेश देणे म्हणजे आंतरराष्ट्रीय नियमांचे उल्लंघन असल्याचा आरोप बासित यांनी केला.
पाकिस्तानी दूतावासातील अधिकार्‍याचा हेरगिरी प्रकरणात सहभाग असल्याबाबतचा आरोप खोडसाळ आणि निराधार आहे, भविष्यात भारताने अशा घटनेची पुनरावृत्ती करू नये, असे बासित यांनीच ठणकावले.

शेअर करा

Posted by on Oct 28 2016. Filed under ठळक बातम्या, राष्ट्रीय, संरक्षण. You can follow any responses to this entry through the RSS 2.0. You can leave a response or trackback to this entry

प्रतिक्रिया नोंदवा

Enable Google Transliteration.(To type in English, press Ctrl+g)

हवामान

  • दृष्टीक्षेपात

      व्हिडीओ संग्रह

      मागील बातम्या, लेख शोध

      Search by Date
      Search by Category
      Search with Google