Home » ठळक बातम्या, नागरी, राष्ट्रीय » भारतात आंतरराष्ट्रीय सागरी पर्यटनाचे नवे दालन

भारतात आंतरराष्ट्रीय सागरी पर्यटनाचे नवे दालन

=साडेतीन हजार क्षमतेचे १८ मजली पंचतारांकित जहाज मुंबई बंदरातून रवाना =
genting_dreamनवी दिल्ली, [५ नोव्हेंबर] – पंचतारांकित आंतरराष्ट्रीय सागरी पर्यटनाचे नवे दालन केंद्रीय भूपृष्ठ परिवहन, महामार्ग आणि जहाजबांधणी मंत्री नितीन गडकरी यांच्या पुढाकाराने आज मुंबई पोर्ट टस्टच्या माध्यमातून देशात खुले झाले. गेल्या आठवड्यात जर्मनीवरून आलेल्या ‘जेन्टिंग ड्रीम’ या १८ मजली विशालकाय पंचतारांकित जहाजाने मुंबई बंदरात नांगर टाकला होता.
मुंबई बंदरातच नव्हे तर आपल्या देशातही पहिल्यांदाच एवढ्या अवाढव्य जहाजाचे आगमन झाले. आतापर्यंत चित्रपटात वा परदेशातच अशा प्रकारच्या पंचतारांकित सोयीसुविधांनी सुसज्ज असे जहाज पाहता येत होते. मात्र नितीन गडकरी यांनी असे जहाज प्रथमच भारतात आणून आंतरराष्ट्रीय सागरी पर्यटनाचा शुभारंभ मुंबई पोर्ट ट्रस्टमधून केला. तरंगते शहर असेच या जहाजाचे वर्णन करता येईल. पंचतारांकित जहाजातून तुम्ही प्रवास करू शकाल, तुमच्या घरचे लग्न, पार्टी यांचे आयोजन या जहाजावर करू शकाल, असे गडकरी वारंवार पत्रपरिषदेत सांगत होते. पण ते स्वप्न असावे, असा समज होता. पण पंचतारांकित विशालकाय जहाज मुंबई बंदरात आणून ते स्वप्न त्यांनी कल्पकतेने साकार केले.
या पंचतारांकित जहाजातून एकाच वेळी साडेतीन हजार पर्यटक जगाचा प्रवास करू शकतील. या जहाजावर १७०० खोल्या आणि १४२ सूट आहेत. जगाच्या वेगवेगळ्या भागातील व्यंजनांचा आनंद पर्यटकांना देण्यासाठी वेगवेगळी ३५ रेस्टॉरेंट आहेत. डान्सक्लब, चित्रपट थिएटर, स्विमिंग पूल, स्पासोबत मनोरंजनाच्या सर्व सुविधा या जहाजावर आहेत. सांस्कृतिक कार्यक्रमाचा आनंदही पर्यटकांना लुटता येणार आहे. या जहाजावर १५०० कर्मचारी पर्यटकांच्या सेवेसाठी आहेत. रात्रीच्या वेळी एलईडी बल्बनी या जहाजावर करण्यात येणार्‍या रोषणाईने पर्यटकांच्या डोळ्याचे पारणे फिटते.
हे जहाज पर्यटकांना कोलंबो, सिंगापूर, हॉंगकॉंग, चीन आणि व्हियतनामचा प्रवास घडवत स्वर्गीय सुखाचा आनंद देणार आहे. आतापर्यंत अशा प्रकारच्या सागरी पर्यटनाचा आनंद लुटण्यासाठी पर्यटकांना परदेशात जावे लागत होते, आता मात्र ही सुविधा मुंबई बंदरातच उपलब्ध करून देण्यात आली आहे. केंद्रीय मंत्री नितीन गडकरी आणि मुख्यमंत्री देवेंद्र फडणवीस यांनी पुढील प्रवासासाठी या जहाजाला हिरवी झेंडी दाखवली.
सागरी पर्यटनाला प्रोत्साहन देण्यासाठी मोदी सरकारने अनेक निर्णय घेतले आहेत. आतापर्यंत अशा प्रकारच्या जहाजांना बंदरात २४ तास राहण्याची मुभा होती, ती आता ३ दिवसांपर्यंत वाढवण्यात आली आहे. यासाठी आकारण्यात येणारे शुल्कही रद्द करण्यात आले आहे. जेन्टिंग ड्रीमसारख्या आणखी ५९ अवाढव्य पंचतारांकित जहाजांनी भारतात या वर्षभरात येण्याची तयारी दर्शवली आहे. यासाठी २२५ कोटी रुपये खर्च करून मुंबई बंदराचा विकास करण्यात येत आहे. यासाठी २ लाख चौरस फूट क्षेत्रफळाचे नवे टर्मिनल तयार करण्यात आले आहे. सध्या येथे २५ हजार चौरस फूटाचे टर्मिनल आहे.
जेंन्टिंगनंतर कोस्टामालिकेतील दुसरे अशाच प्रकारचे कोस्टा नीओ क्लासिका हे पंचतारांकित जहाज २२ नाव्हेंबरला मुंबई बंदरात येणार आहे. या जहाजाची दर १५ दिवसांनी एक फेरी होणार आहे.

शेअर करा

Posted by on Nov 6 2016. Filed under ठळक बातम्या, नागरी, राष्ट्रीय. You can follow any responses to this entry through the RSS 2.0. You can leave a response or trackback to this entry

प्रतिक्रिया नोंदवा

Enable Google Transliteration.(To type in English, press Ctrl+g)

हवामान

  • दृष्टीक्षेपात

      व्हिडीओ संग्रह

      मागील बातम्या, लेख शोध

      Search by Date
      Search by Category
      Search with Google