Home » ठळक बातम्या, मुंबई-कोकण » मला हटविणे बेकायदेशीर : सायरस मिस्त्री

मला हटविणे बेकायदेशीर : सायरस मिस्त्री

  • रतन टाटांवर आरोपांच्या फैरी
  • बचावाची संधी आणि निर्णयस्वातंत्र्य दिले नाही
  • शेअर्समध्ये पुन्हा घसरण

New Delhi:  **FILE** File photo of Cyrus Mistry whom Tata Sons on Monday removed as its Chairman, nearly four years after he took over the reins of the group. PTI Photo (STORY DEL66) (PTI10_24_2016_000175A)

मुंबई, [२६ ऑक्टोबर] – टाटा समूहाच्या अध्यक्षपदावरून तडकाफडकी हटवण्याच्या निर्णयावर सायरस मिस्त्री यांनी संचालक मंडळातील सदस्य आणि टाटा ट्रस्टला ई-मेल पाठवून आज आपला संताप व्यक्त केला. टाटा सन्सचे अध्यक्ष रतन टाटा यांच्यावर त्यांनी अनेक गंभीर आरोप केले आहेत. संचालक मंडळाच्या  निर्णयाने आपल्याला धक्का बसला असून हा निर्णय बेकायदेशीर  असल्याचे त्यांनी म्हटले आहे. आपण चेअरमनपदावर असताना रतन टाटा यांच्याकडून एकसारखा हस्तक्षेप सुरु होता. माझ्या अधिकारांमध्ये सतत कपात करून अखेरीस मला ‘नामधारी अध्यक्ष’ बनविण्यात आले, असा आरोपही त्यांनी केला.
आपण समूहाची सूत्रे स्वीकारल्यानंतर  टाटा सन्सने अनेक नियमांमध्ये बदल केला. त्यामुळे आपल्याला निर्णय घेण्याचे पूर्ण स्वातंत्र्य मिळाले नाही. कंपनीच्या अध्यक्षाला त्याची बाजू मांडू न देता हटविण्यात आले. कॉर्पोरेट क्षेत्राच्या इतिहासातील अशा पद्धतीचा हा एकमेव निर्णय असेल, असे सायरस मिस्त्री यांनी म्हटले आहे. नॅनो प्रकल्प तोट्यात असतानाही, भावनिक कारणांसाठी रतन टाटा यांनी तो सुरू ठेवला. यामुळे समूहास नुकसान सहन करावे लागले.
मी अध्यक्षपदासाठी सुरूवातीला नकार दिला होता. स्वत:चा व्यवसाय पुढे नेण्यामध्ये मला जास्त स्वारस्य होते. मात्र निवड समितीला योग्य उमेदवार सापडला नाही. मला फेरविचार करण्याची विनंती करण्यात आली. त्यावेळी टाटा समूहाचे हित डोळयासमोर ठेऊन अध्यक्षपद  स्वीकारण्याचा निर्णय घेतला. संपूर्ण स्वातंत्र्य देण्यात येईल असे सांगण्यात आले होते. पण नियुक्तीनंतर पूर्ण स्वातंत्र्य मिळाले नाही.
कुठलेही स्पष्टीकरण न देता मला हटविले. त्यामुळे माझे आणि समूहाच्या प्रतिमेची मोठी हानी झाली आहे. टाटा सन्सच्या संचालक मंडळाच्या बैठकीत आपण  भविष्यकालीन योजना सादर केली होती, असेही त्यांनी म्हटले आहे.
दरम्यान, टाटा सन्सच्या अध्यक्षपदावरुन सायरस मिस्त्री यांना हटविण्यात आल्याने टाटा समुहातील कंपन्यांच्या शेअर्सवर आज बुधवारी परिणाम झाला. कंपनीच्या समभागांची पुन्हा घसरण झाली. टाटा समूहातील कंपन्यांचे बाजार भांडवल सुमारे १० हजार रुपयांनी दुसर्‍या दिवशीही कमी झाले.

एक लाख १८ हजार कोटींचा फटका बसेल
नफ्यात नसलेल्या उद्योगांमध्ये टाटा समूहातील पाच कंपन्यांची मोठी  गुंतवणूक आहे. त्यामुळे  समूहाला एक लाख १८ हजार कोटींचा फटका बसू शकतो, असे सायरस मिस्त्री यांनी टाटा सन्सच्या संचालक मंडळातील सदस्यांना पाठवलेल्या ई-मेलमध्ये म्हटले आहे.

कॉर्पोरेट व्यवस्थेचा अभाव
टाटा समूहात कॉर्पोरेट व्यवस्थेचा अभाव आहे. टाटा उद्योगसमूहामधील भागधारकांसाठी असलेले कर्तव्य पार पाडण्यात संचालक मंडळ अपयशी ठरले आहे. समूहात सत्तेची समांतर केंद्रे तयार झाली आहेत. आपल्याला अखेरीस केवळ ‘नामधारी’ अध्यक्ष बनविण्यात आले, असा ठपका सायरस मिस्त्री यांनी टाटा समूहावर ठेवला आहे. कुटुंबाच्या ट्रस्टमधील अनेक सदस्य ‘पोस्टमन’ची भूमिका निभावत असत. वारंवार बैठक सोडून सूचना घेण्यासाठी ते रतन टाटा यांच्याकडे जात, अशी टीकाही त्यांनी केली.

शेअर करा

Posted by on Oct 27 2016. Filed under ठळक बातम्या, मुंबई-कोकण. You can follow any responses to this entry through the RSS 2.0. You can leave a response or trackback to this entry

प्रतिक्रिया नोंदवा

Enable Google Transliteration.(To type in English, press Ctrl+g)

हवामान

  • दृष्टीक्षेपात

      व्हिडीओ संग्रह

      मागील बातम्या, लेख शोध

      Search by Date
      Search by Category
      Search with Google