Home » ठळक बातम्या, राष्ट्रीय, संसद » लोकसभेत प्रचंड गदारोळ

लोकसभेत प्रचंड गदारोळ

=कामकाज दिवसभरासाठी स्थगित=
तभा वृत्तसेवा
नवी दिल्ली, १७ नोव्हेंबर
loksabhaपाचशे आणि हजार रुपयांच्या नोटा चलनातून रद्द करण्याच्या सरकारच्या निर्णयावरुन संसदेच्या दोन्ही सभागृहात आज प्रचंड गदारोळ झाला. या मुद्यावरून झालेल्या गोंधळामुळे लोकसभेचे कामकाज दिवसभरासाठी स्थगित करण्यात आले. राज्यसभेतही विरोधकांच्या आक्रमक भूमिकेमुळे दुपारी दोन वाजेपर्यंत चारवेळा कामकाज स्थगित करावे लागले.
आज लोकसभेच्या कामकाजाला प्रारंभ होताच कॉंग्रेस आणि अन्य पक्षांच्या सदस्यांनी स्थगनप्रस्तावाची नोटिस दिली. नोटबंदीच्या मुद्यावरून देशात प्रचंड गोंधळाचे वातावरण निर्माण झाले आहे, लोकांना अतिशय हालअपेष्टांच्या परिस्थितीचा सामना करावा लागत आहे, याकडे लक्ष वेधून सभागृहातील प्रश्‍नोत्तराचा तास स्थगित करत या मुद्यावर तात्काळ चर्चा सुरू करण्याची मागणी कॉंग्रेसचे गटनेते मल्लिकार्जुन खडगे यांनी केली. हा निर्णय जाहीर होण्यापूर्वीच फुटला, ही अतिशय गंभीर बाब आहे, असे ते म्हणाले. या मुद्यावरून कॉंग्रेस, तृणमूल कॉंग्रेस, डावे पक्ष आणि अण्णाद्रमुकचे सदस्य घोषणा देत वेलमध्ये आले. यामुळे सभागृहात प्रचंड गोंधळाचे वातावरण निर्माण झाले. सभापती सुमित्रा महाजन सदस्यांना आपल्या जागेवर जाण्याचे आवाहन करत होत्या.
काळा पैसा, भ्रष्टाचार तसेच नकली नोटांना लगाम घालण्यासाठी सरकारला हा निर्णय घ्यावा लागला, असे संसदीय कामकाज मंत्री अनंतकुमार यांनी सांगितले. काळ्या पैशाच्या बळावर फोफावणार्‍या दहशतवादालाही आटोक्यात आणण्यासाठी सरकारला हा निर्णय घ्यावा लागला, असे ते म्हणाले. या निर्णयावर देशातील जनता सरकारसोबत असल्याचे स्पष्ट करत अनंतकुमार म्हणाले की,  नोटबंदीसह सर्व मुद्यांवर सरकार चर्चेला तयार आहे. विरोधक स्थगनप्रस्तावाद्वारे चर्चेची मागणी करत असतांना अनंतकुमार यांनी नियम १९३ नुसार सरकार  चर्चेला तयार असल्याचे सांगितले.
सरकार चर्चेला तयार आहे, त्यामुळे तुम्ही आपल्या जागेवर जा, असे सभापती महाजन म्हणत होत्या, पण विरोधी सदस्य ऐकण्याच्या मनस्थितीत नव्हते. सरकार चर्चेला तयार असतांना तुम्हाला चर्चा करायची नाही, फक्त गोंधळ घालायचा आहे, असे संतप्त होत महाजन म्हणाल्या. आम्ही नियम ५६ नुसार स्थगनप्रस्ताव दिला आहे, त्यामुळे सभागृहाचे कामकाज स्थगित करुन चर्चा करा, असे खडगे म्हणाले. तृणमूल कॉंग्रेसचे सुदीप बंदोपाध्याय यांनी सरकारने हा निर्णय मागे घेण्याची मागणी केली. राजदचे जयप्रकाश नारायण यादव आणि माकपचे मोहम्मद सलीम यांनीही या मुद्यावरून सरकारवर हल्ला चढवला. विरोधी सदस्यांच्या घोषणा सुरूच होत्या. पंतप्रधानानी उत्तर द्यावे, अशा घोषणा विरोधी सदस्य देत होते. या गोंधळातच सभापती सुमित्रा महाजन यांनी प्रश्‍नोत्तराचा तास पुकारला. मंत्री उत्तर देत होते, पण गोंधळामुळे काहीच ऐकू येत नव्हते. त्यामुळे महाजन यांनी आधी एकदा १५ मिनिटांसाठी सभागृहाचे कामकाज स्थगित केले. कामकाज सुरू झाल्यावर पुन्हा असाच गोंधळ होत असल्यामुळे त्यांनी दिवसभरासाठी कामकाज स्थगित केले.

शेअर करा

Posted by on Nov 18 2016. Filed under ठळक बातम्या, राष्ट्रीय, संसद. You can follow any responses to this entry through the RSS 2.0. You can leave a response or trackback to this entry

प्रतिक्रिया नोंदवा

Enable Google Transliteration.(To type in English, press Ctrl+g)

हवामान

  • दृष्टीक्षेपात

      व्हिडीओ संग्रह

      मागील बातम्या, लेख शोध

      Search by Date
      Search by Category
      Search with Google