Home » प.महाराष्ट्र » फलटण नगरपालिकेत विरोधकांचा ठिय्या

फलटण नगरपालिकेत विरोधकांचा ठिय्या

25sata17तभा तालुका प्रतिनिधी
फलटण, [दि. २५ ऑक्टोबर] – फलटण नगरपालिकेच्या निवडणुकीसाठी अंतिम यादी प्रसिद्ध झाल्यानंतरही हरकत नसताना प्रभाग क्र. ३ मधील तीनशेच्यावर नावे प्रभाग क्र.५ मध्ये समाविष्ट केल्याच्या निषेधार्थ सर्व विरोधी पक्षांनी नगरपालिकेतच ठिय्या मांडून अधिकार्‍यांना धारेवर धरले तर एका नगरसेवकाने झोपूनच निषेध व्यक्त केला. संतप्त विरोधकांच्या आक्रमकतेपुढे प्रांताधिकारी व मुख्याधिकारी यांनी पोलीस बंदोबस्तात पळ काढला. नगरपालिकेत आज दिवसभर तणावाचे वातावरण निर्माण झाले होते.
याबाबतची माहिती अशी की, नगरपालिकेसाठी अंतिम यादी प्रसिद्ध झाल्यानंतरही अचानक तीनशेपेक्षा जास्त नावे प्रभाग क्र. ५ मध्ये टाकल्याचा आरोप करीत राष्ट्रीय कॉंग्रेस, भाजपा, शिवसेना, रिपब्लिकन पक्ष, शेतकरी संघटनेच्या पदाधिकार्‍यांनी सहाय्यक निवडणूक निर्णय अधिकारी तथा मुख्याधिकारी यांच्याविरोधात ते राष्ट्रवादी कॉंग्रेसचे कार्यकर्ते असल्याचा आरोप करत त्यांच्याविरुद्ध कारवाई करण्याची मागणी निवडणूक निर्णय अधिकारी तथा प्रांताधिकारी संतोष जाधव यांच्याकडे केली. जोपर्यंत नावे बदलली जात नाहीत व मुख्याधिकार्‍यांवर कारवाई होत नाही तोपर्यंत नगरपालिकेतच बसण्याचा इशारा विरोधकांनी देऊन तेथेच सर्वजण बसले. अंतिम यादीत मुख्याधिकारी यांनी सत्ताधार्‍यांच्या दबावामुळे बदल केल्याने त्यांना तातडीने बडतर्फ करा अशी मागणी कृष्णा खोरे महामंडळाचे माजी उपाध्यक्ष रणजितसिंह नाईक निंबाळकर, स्वराज संघटनेचे अध्यक्ष दिगंबर आगवणे, माजी नगरसेवक समशेरसिंह नाईक निंबाळकर, ऍड. नरसिंह निकम, राष्ट्रीय कॉंग्रेसचे जिल्हा सरचिटणीस जयकुमार शिंदे, शहराध्यक्ष अशोकराव जाधव, शिवसेना उपजिल्हाप्रमुख विराज खराडे, तालुकाप्रमुख विकास राऊत, भाजपा युवा मोर्चाचे जिल्हा उपाध्यक्ष मितेश खराडे, भाजपा तालुकाध्यक्ष सुशांत निंबाळकर, रिपब्लिकन पक्षाचे तालुकाध्यक्ष हरिष काकडे, महेंद्र बेडके, अनिल तावरे, अमिरभाई शेख, अनिकेत कदम यांना कारवाई झाल्याशिवाय येथून उठणार नाही व कोणाला बाहेर जाऊ देणार नाही असा इशारा दिल्याने तणावाचे वातावरण निर्माण झाले होते.
रणजितसिंह निंबाळकर, समशेरसिंह नाईक निंबाळकर, ऍड. नरसिंह निकम यांनी निवडणुकीच्या अनुषंगाने विविध दाखले देत मुख्याधिकार्‍यांवर कारवाई करा, यादीत बदल करा अशी सातत्याने आक्रमकरित्या मागणी लावून धरल्याने तणावाची परिस्थिती निर्माण झाली. मोठ्या प्रमाणात पोलीस बंदोबस्त नेमण्यात आल्याने नगरपालिकेला छावणीचे स्वरुप आले होते.
मुख्याधिकार्‍यांवर कारवाई संदर्भात प्रांताधिकारी काहीच निर्णय घेत नसल्याने आम्हाला तुम्ही मुख्याधिकार्‍यांवर कारवाई करु शकत नाही, मी निर्णय घेऊ शकत नाही असे लेखी पत्र द्या व तुमच्या पदाचाही राजीनामा द्या अशी मागणी संतप्त आंदोलकांनी केल्यावर मी लेखी स्वरुपात देतो असे सांगत प्रांताधिकारी यांनी पोलीस बंदोबस्तात मुख्याधिकार्‍यांच्या केबिनकडे धाव घेतली. मात्र आंदोलकांनी तुम्ही येथून जाऊ नका असे सांगत त्यांना अडविण्याचा प्रयत्न केला. यावेळी उपविभागीय पोलीस अधिकारी रमेश चोपडे यांनी तुम्ही प्रांताधिकारी साहेबांना अडवू शकत नाही. त्यांना त्यांचे काम करु द्या असे सांगत त्यांना बाहेर नेले. यावेळी आंदोलक व पोलिसांची जोरदार तू-तू-मै-मै झाली.

शेअर करा

Posted by on Oct 26 2016. Filed under प.महाराष्ट्र. You can follow any responses to this entry through the RSS 2.0. You can leave a response or trackback to this entry

प्रतिक्रिया नोंदवा

Enable Google Transliteration.(To type in English, press Ctrl+g)

हवामान

  • दृष्टीक्षेपात

      व्हिडीओ संग्रह

      मागील बातम्या, लेख शोध

      Search by Date
      Search by Category
      Search with Google